صندوق
هشام صبح
قرب جرب صندوق مسحور
مليان أسرار
وحكاوى الدار
ترقص تضحك جايز تبكى
كله مربوط على كيف ماتشوف
ألا اونا ألا دو
أهو زحنا ستار
عن أرض عمار
واقفين زنهار
حوالين البير
لا البقرة السمرا تروح وتغيب
ونقول فى بيان
نعمل اعلان
ونثور ونقوم
ونعود وننام
فى امان وسلام
ونقول ازاى
ونغنى بناى
تعزف اوتارنا بلحن شجين
نرجع ونقول
الا اونا الا دو
.....................
قرب جرب صندوق مسحور
صندوق مجنون
راح يحكى حكاية قلب حزين
وعيون هايمين
تايهين سارحين,فى بلاد الله
من غير مواعيد
يتفسر حلمه ويبقى قريب
والصورة عمار
والقلب خضار
والبسمة بتجرى ترد الروح
والحلوة بتغزل توب الفرح
والموج يعلا
ميفوتش وراه غير بذر المر
والدايرة تدور
ويعود السور
حوالين القلب يغمى النور
ألا اونا ألا دو
قرب جرب صندوق مسحور
............................
الا اونا ألا دو
قرب جرب صندوق ألوان
من غير عنوان
العرض الاول للفنان
هتشوف حركات
والتعلب فات
وتعد فى ديله سبع لفات
والبهلوانات
ع الحبل اهى ماشية بتترقص
والعمر ساعات
وساعات بتفوت
والحى يموت
ونعيش اموات
من غير أرواح
والروح اسرار
والعالم وحده بطبع الكون
يخفى المعلوم
ونعيد ونزيد
ألا دو الا تريه
صندوق مجنون
قرب جرب وانت تشوف
........................
قرب جرب صندوق رقاص
صندوق هزاز
وبيوته قزاز
خش وشوف
لف وطوف
ده حاله مايل
وده حاله لسه
واقف معدول
وده ساجد خوف
وده بطل يحلم لجل يعيش
وان عيشته مفيش
يكفيه تغطى بنص رغيف
قدامنا رصيف
هنمد خطاوى نعدى عليه
ونبص نلاقى ألوف وألوف
ماشيين ماشيين
على فين رايحين؟
يمكن فاهمين؟
ندخل وسطيهم واحنا نشوف
شايفين سرداب؟
يمكن ده ضباب؟
والا أقولك,
مااحناش لاعبين
هيقولوا مجانين؟
يمكن عاقلين,
يمكن سكتنا آخرها النور
يالا نكمل مع بعض نقول
ألا اونا ألا دو
ونزود حبه كمان ونقول
ألا دو الا تريه
صندوق مسحور
صندوق مجنون
بيهز الهزة يصحى الكون
ألا أونا الا دو
