تحقيق
هاني مهران
اقْعد في مكانك.. ولا تِنْطَق
إيَّاك تتحَرك أو تهرب
هوَّ انت فاكرنا معاك نلعب.. نضحك
عارفينك يا حرامى
_ يا ابن الحرامية _
قبضنا عليك
ووقعت يا حِلو.. ولا حَدِّشْ خالص سَمَّى عليك
اسمك؟ عنوانك؟ شُغْلَانْتَك؟
وريني بطاقتك
مظبوط.. انت المطلوب
ثابت في ورقنا إن انت موظف
وبتقبض 150
- في الشهر -
من غير ما هَنِحْسِدْ أو هَنْقُر
قُل لى بسرعة
إزاي عايش ؟؟!! وإزاي بَقَى عاقل مش طايش ؟؟
ثابت في ورقنا
إن إيجار شهر الشقة 160
تقدر تنطق جِبْتِ العشرة الفرق منين ؟؟
شغلانة بعد الظهر ؟؟!!
مممممم
يعني بتاخد كام ؟؟
عشرة.. عشرين ؟؟ حلوين جداً
متجوز ومخَلِف وَلَدِين
عندك غسالة وتلاجة.. مكواة
وشايف إن الأمر بسيط
تقسييط ؟!
ماشي
تقدر تِنْكر إنك عندك تليفزيون ؟؟
مش خايف ؟!
فيه مخبر سِمْعَك بتهيَّصْ لما الأهلي فاز ف بطولة كاس العالم
عارف طبعاً إن بطولة كاس العالم مش مِتْذَاعَة
يعني جنابك عندك وَصْلَة
يعني كمان عشرين ف الشهر أو تلاتين
غير الأقساط وإيجار الشهر وأكل وشرب.. فلوس تموين
طَبْ جبت منين ؟؟؟!!!
***
عندك تليفون أرضي.. وكمان محمول
غير إن جنابك دافع مَيَّة ودافع نُور
وسيادتك عارف.. وصل النور مش جاي لوَحدُه
جاي معاه لا مؤاخذة زبالة ..
زبالة بيتكوا ما تتوصاش
ف 12 مِنُّهْ
لقينا إزازة دَوَا فاضية وعلبة كبسول
يعني كشفت ورُحت سيادتك للدكتور
يعني دفعت
طب جبت منين ؟؟!!!
***
تقدر تِنْكر إن ولادك طول الشهر بياخدوا دروس
يعني فلوس
طب جبت منين ؟؟!!!
***
بيقولوا مراتك خبزت كحك ليوم العيد
وولادك كانوا بلِبس جديد
غير إنك طلعت عيديَّة
بعد ما خلصت صلاة العيد
طب جبت منين ؟؟!!
تقدر تنكر
إنك بتسيب مصروف في البيت؟
تقدر تنكر
إن مراتك ف 12 مِنُّهْ
ف نفس اليوم الحادثة إيَاها
جابت علبة سمنة كبيرة وجابت برده إزازة زيت؟
***
تقدر تنكر
إنك جبت كَوتش لابنك يوم 16؟
وإنك رحت حَلَقت وجيت؟
وولادك برده حَلَقُوا معاك
طب كارت الشحن / لتر البيبسي/ كيس الفاكهة/
كيلو السكر / .../ ...
تقدر تنكر
إنك في الأسبوع الماضي وَاكل لحمة ؟
يا ابن الكلب
وتقول غلبان وبتتمَسْكِن
وف كل مكان تقعد تشكي
عندك أمراض مش عارف ايه
مصاريف الواد مش عارف ايه
مصاريف البيت مش عارف ايه
واحنا م الطايفة المظلومة
وتَمَلِّي بتشكي وبتحكي
وتقول ما هُو منك يا حكومة
اختشي على دمك يا حرامي
ما قبضنا عليك
ووقعت يا حِلو
ولا حَدِّش خالص سَمَّى عليك
( تم كتابتها 2006 )
