قميص نازف زرار مقطوع
أمير لبيب
بيقلع دمه و قميصه
يعلقهم على الايام
فيتشعبط زرار ضايع
فى اخر فتله بهتانة
و يتمسك .... بإنه يعيش
ــــــ
و لما بيسأل النجمة
عن السبب اللى خلى البدر
مش باين بقاله سنين
ترد بسخرية تقوله
غياب البدر متقدر
و لو يلقى الجريح قمره
هايبقاله
بدون مواعيد
ـــــــــــ
بيسأل نفسه فين الضحك من بدرى
فيضحك .... بس ضحكة عليه
و يستنى اوان الحلم فى منامه
فيستنى ..و يستنى
كأن مالوش رصيد كافى
عشان يمنح
جواز الحلم تأشيره
و يختم فيزا للألوان
تشق الليلـــــ
و أحيانا
يسيب النفس للمحنة
كأنه لوحده فى المجاريح
و يستغرب
بأن صوت النقشبندى بيألمه
و شعر الرومى كالعادة
فى عز النشوى بينقط
نغم تواشيح
ـــ
يعدى الليل مالوش اخر
و تطلع شمسه خجلانة
و بردانه
يبص فى عينها من جوه
فتتكسَّر عيون الاتنين
و يرفع عينه من تانى
فترفع شمسه بسمتها
و تفضل برضه بردانه
يدفيها بشاى الصبح بالنعناع
و يلبس دمه من تانى
و يرجع تانى يضحكله
قميص نازف ... زرار مقطوع
