إبني جاني في المنام
عادل عثمان الحجر
إبني جاني في المنام
============
قوم ياخالد
قوم يامينا
ع اللي جاب الغدر لينا
إبني راح لاجل امَّـا يحرس ..
موته بيغـرَّق عنينا !
*****
إبني جاني في المنام
قال لي موت الغدر قاسي
قال إوعى تبقى ناسي ...
دمِّـنا ياابا وعاهدني ..
كل غادر راح يموت
إوعوا تستحلوا السكوت
مصر أكبر م الكلام
مصر أكبر م الطاغوت
بس ياابا حقي عندك ..
ولاَّ ليه ابنك يموت ؟!
قالوا ياما في المعسكر ..
اللي يغدر بينا يسكر ...
بس اخويا لما مات ..
العيون بتبات تغمَّض !!
واللي حاصل
واللي واصل
دمِّـنا أصبح رخيص ..
لمَّـا سال بايد الخسيس
*****
إبني جاني في المنام
قال لي قوم قول للرئيس ..
حقِّـنا لابد ياخدُه / بالقصاص
حق لازم
حق مش باطل ياناس
*****
إبني جاني في المنام
واسمعُـه يصرخ يقول :
مصر ياامَّـه يابهيه
دمي ليكي ..
كوني ليـَّا
واوعي دمي يكون رخيص ..
تحيي في الخيبه القويـَّه
*****
إبني قال لي في المنام
ياابا إزرع
بس لازم قـَـبْله تقلع ..
كل خاين أو جبان
لأ وبالقرآن يتاجر
يبقى لعبة لامريكان .
===========
