و الحلو أقوله يا حلو ف عيونه
حبيبتي الجميلة زوز الشهيرة ب عزة
بعد التحية و الأشواق
أحب أقولك إنك بجد و بدون أدني مبالغة من مظاهر الحياة بالغة الجمال و اللي بتخلي الواحد يتمسك بالحياة و يشوف كل حاجة حلوة و حلوة أوي كمان مش بس عشان أنتٍ نفسك حاجة حلوة و من الحاجات العظيمة اللى خلقها ربنا - اللى هو جميلة من بره و رائعة من جوه - لا ده عشان كمان وجودك ف أي مكان و بأي صورة بيشع بهجة و دفا ، فيه ناس كده حتى لو سيرتها جت تلاقي الواحد ابتسم و نزل عليه سَكينة و اطمئنان ، أنتِ من أوضح صور البني آدمين دول ، ده لو ينفع يتصنفوا عادي مع باقى البشر ف نفس الدرجة يعني ، ما هو طبيعي يكون الناس درجات حسب مقدار صفائهم و رُقيهم و دفاهم و أنتِ مقامك كبير أوي ف قلبي يا عزة
ليه بكتبلك الكلام ده !؟
أكيد مش لازم يكون فيه مناسبة بس الواحد بيحب يقول للحلو يا حلو ف عيونه خصوصًا أنك اجمل الحلوين و ربنا عالم إني شايفاكي كده من غير مبالغات ، يا رب دايمًا محلية الدنيا و ربنا يسعدك بقى على أد ما بتخلى كل اللى حواليكي مبسوطين
كل سنة و أنتِ طيبة
