.. سؤال بيدور ع الاجابة الصح ..
أمير لبيب
اللى قضى العمر يبحث عن حقيقة
كانت نتيجة رحلته
عمره انتهى
!!
ـــــــــ
ماتدمعيش يا ضحكة شاردة
من سجون التنهيدات
و ماتسأليش يا الف معنى
ايه اللى فاضل من حياتنا
غير شوية ذكريات
بس إسألى ..ـ
يا كل كلمة بتتكتب
مليون سنة
ليه الف كلمة بتتنسى
و كلمة بتصحى .... حاجات
ـــــــــــــــــــ
الحقيقة ....ـ
يا سبع حروف
بيوجعونى من زمان
امتى اللقا ..؟؟
الزيف بينضح من لسان
كل اللى عاملين اتقيا
و الحب مليان بالوجع
الضحك مش طيب اوى ..
ما الشر برضه بيبتسم
حتى النهار
بيجيله لحظة و يهزمه
ليل الكسوف
مكسوفة يا شمس الحقيقة تنورى
و ازاى نشوف ....؟؟؟؟؟؟
ــــــــــــــ
ملايين حاجات متلخبطة
جوايا يا كونى الصغير
ليه المطر
بيطفى نار البردانين
و يسيب شقوق الارض
هاتموت م العطش ؟؟
...
طب مين اخف فى محنته
اللى شايف من عينيه
بس قلبه مستخبى
من ضميره فى حته ضلمه
جوة منه ...
ولا اللى شايف ضلمته
بس شايف كل حاجة
جوة روحه منورة و بتبسم
..سؤال كمان
يعنى ماينفعش اللى شايف من عينيه
يقدر كمان قلبه يشوف؟؟
طب يعنى لازم كل لحظة حب صادقة
تنتهى دايما بخوف ..؟؟
طب يعنى قلبى لو يحبك
باختياره
مش برضه عيب
لو يبقى واحد من صفوف ؟؟
ــــــــــــــ
مليون سؤال
و ميت مليون من الاجابات
و انت اللى تختار الطريق
من غير وجود
فرصه لإعادة الامتحان
ــــــــــــــ
اخر كلام ......ـ
سور الحقيقة مستحيل تتسلقه
غير لو يكون
عقلك بينوى الانتحار
