عايز إيه ؟؟
إبراهيم الصمدي
- عايز إيه ؟؟
عايز إيه ؟؟
-عايز حقي يا مجلس بيه :(
--عايز حقك ؟؟
حقك إيه ؟؟
-عايز حق ولاد شهداء
ولا صرخوا ولا قالوا الواء
ضحوا عشنا لجل نعيش
بعد ما ماتوا لقينا مفيش
ولا حسينا بالتغيير
هما يادوب حبة تسيير
أنا قصدي تسيير أعمال
مش قصدي حمير ولا جمال
ولا دقنا طعم الحرية
بس أنا حبيت الملوخية
:U يا سلام بقى لو في كام أرنب
مش قصدي ملايين اتسرقوا
ومرجعوش حتى الآن
أنا قصدي الأرنب أبو ودان
عالملوخية بيبقى جنان
بس الخبز وفرتوه
ومعاه برده حبة مووووووز
ومعاه شطة وملح وكاتشب
للي يعوز
للكتشاب لون احمر غامق
بيفكرني بحاجة عندي
يمكن مثلا لون الشنطة
يمكن مثلا لون البشرة
يمكن مثلا لون الدم
أيوه الدم .. هو الدم الفاير غامق
منا صحبي كان واقف جنبي يوم ما رصاصة .. م القناصة
سرقت روحه
والناحية التانية كان مينا
بيضمد لحمادة جروحه
قلت خلاص الثورة دي طاهرة
و الحرامية راح تتلم
م الليلة المشهودة دي هي
كله عدل .. ولافيش ظلم
بس أنا مستغرب من حاجة
دلوقتي مينا وحمادة
رجعوا يتخنقوا بزيادة
وأنا نفسي أعرف .. طيب ليه ؟؟!!
وتقولي أنا عايز إيه ؟؟
فالحين بس تزعقوا فينا
وتطلعوا عين أبوا أهالينا
وأنت وحش بتسب المجلس
روحوا هاتوه .. امسك اكبس
وأنت فلول
وانت حمار و بتاكل فول
وده لسة عيل بيخطرف
بس كلامه يهيج شعب
حطه في زنزانة الحرامية
ويا شلاضم وعطوة الكلب
عسكري : بس شلاضم قاتل تسعة
وعطوة الكلب .. معندوش قلب
-طب قوللي .. أنا أعمل إيه ؟؟
أعمل زنزانة للفيس بوك
سيرفر خاص .. فيف ستارز
والنت كمان اربعة جيجا .. لكل جهاز
وأعمل سور السجن ازاز ؟؟ :@
--بص يا مجلس أنا زي إبنك
آخر مرة هاجي وأقولك
أنا عايز إيه
بس ياريت
أعرف منك
هو سيادتك عايز إيه ؟؟
