يا نيل..
نادية مدني
بافهم لُغاك يا نيل
مهما تطيل السكوت
وتشوف دموع الكلام
في القلب لما تموت
واعرَف يا نيل إمتى
الميّة لما تفوت
على قلب عاشق طري
محبوبُه فيه بيفتري
تبقى له ريّ وقوت
وبافهم الضحكات
لمّا تيجي منك
وبافهم الحكايات
لمّا تكون عنك
وبافهمك بالليل
لمّا بلون الغُنا
بتلوّن الصفحة
وبتبعت الفرحة
على شطّك الدافي
تطرح لُقا وبيوت
وبافهمك في البعاد
لمّا تواسيني
بنَسيم على ضفّتك
ساري.. تسلّيني
وتقول لي مهما غاب
مِسير هوى اﻷحباب
يرجع يدق الباب
واﻷزمة دي؟ حتفوت
بيني وبينك يا نيل
عهدك تصون سرّي
وتحفظ اللي اتحكى
وتداري عاللي بكى
وترد باللي يهوّن
على لسان مكبوت
وانا من حياتك بَقيت
وعلى ضفافك هَويت
وليك حكيت واشتكيت
مستنياك يا نيل
فبلاش تطيل السكوت
