عزيزتى الفتاة اللى لسه ما اتجوزتش
حنان الجوهري
عزيزتى الفتاة اللى لسه ما اتجوزتش .. و حياة امى انتى ف نعمة
عزيزتى الفتاة احب اقولك ان اكبر حماقة هى الجواز .. اعظم و اجمل حماقة .. أه اجمل طبعا .. الجواز حلو حبة صغيرين و سخيف و ابن &%$ حبات كتير .. لا كتير قوى , بصوا هو منيل بنيلة على طول الا فيما ندر.
"انتوا فاكرين ان الجواز بوس و احضان ؟ " هذا هو السؤال التهكمى الذى طرحه سامح – شريف منير – فى فيلم " سهر الليالى " على اصحابه ليله هروبهم من زواجاتهم الى اسكندرية فرارا من الجواز و من عقدهم و مشاكلهم .. لم تأت الاجابة حتى نهاية الفيلم و لكننا نعرف ان الزواج ليس فقط " بوس و احضان ؟ بل هو خناق على حاجات تافهة بسبب مشاكل جوانية صعب نعبر عنها فبنتلكك لبعض و تبقى خناقة على انه نزل من غير ما يقولك صباح الخير او نسى يجيب بامبرز و هو جاى او انك بقى لك 3 ايام ما بتطبخيش من قلة النوم عشان الواد مسهرك.
عزيزتى العانس انت فى نعمة .. واثقة تماما مما اقوله و لو خيرت ان يعود بى الزمان مرة اخرى لاخترت العنوسة بقلب سليم .. صحيح مش هاسيب جوزى و نفضل مرتبطين ببعض كاصحاب لكن مش هاتجوزه مش هاتجوزه .. و ما تكلمنيش عن الخلفة و الامومة انت ما جربتيش تغيرى لطفل البامبرز الساعة 5 الصبح ثم تانى 5 و نص ثم تالت الساعة 7 .. الاطفال فى الشهور الاولى بيبقى ربنا فاتحها عليهم .. ا جربتيش انك تخشى فى باب الاوضة مرتين بوشك من كتر الدوخة و قلة النوم بينما جوزك نايم جوه فى الاوضة لا يريد مشاركتك سهرة كل يوم التى لا تنتهى .. ما جربتيش تقفى تطبخى و انتى شايلة البيبى على ايد و الايد التانية فى بتقلب التقلية او بتدوس على زرار الخلاط تعصر الاوطة .. ما جربتيش انك ما تعرفيش تاخدى دوش الا لما جوزك ييجى يتكرم و يشيل البيبى لمدة ربع ساعة و ينده عليكى خلالها 4 مرات " البت قشطت فين البافتة ؟ " او " بتعيط اعمل ايه ؟ " و تطلعى بسرعة تنجدى البيبى من العياط .. خلفة ايه يا أنسة ؟ صلى ع النبى
عارفة تماما ان الجواز بالنسبة لك هروب من تحكم باباكى او رخامة مامتك .. انا شخصيا كانت من اهم الدوافع لجوازى هو انى اعمل بيت بتاعى انا .. انا اللى اتحكم فى تفاصيله و فى نوع الاكل اللى هاكله و هاحط فين الترابيزة واخرج امتى و ارجع امتى .. ما انكرش ان دى ميزة رائعة لانها الحالة الوحيدة اللى تقدرى تسيبى فيها بيت اهلك لما تكونى رايحة بيت جوزك المندوب السامى البريطانى الجديد بدلا عن اهلك .. و انتى و شطارتك ورينى هتعرفى تعملى اللى انت عاوزاه بما لا يخالف شرع الجواز ولا لأ و ابقى قابلينى لو عرفتى تقررى هترصى النيش بتاعك ازاى يوم ما تروحى تفرشى بيتك ..ستواجهك امك بحقيقة علمية و بوجه حاد " اومال خالتك جاية تعمل ايه ؟ دى عليها رصة نيش .. ما تزعليهاش و سيبيها ترصه زى مانت عايزة بلاش فضايح ".
ممكن تغيرى ف بيتك بعد كده لكن زيارة واحدة من امك او حماتك ستكون كفيلة باعادة توزيع العفش مرة اخرى على هواهم لانك ما بتفهميش فى رص العفش او فى الذوق العام .
عزيزتى الفتاة انتى فى نعمة : بتروحى و تيجى بطولك من غير شنطة غيارات و من غير عيل على كتفك او عيل بتجرجريه وراكى و فى ايدك التانية شنط الخضار و العيش و الطلبات .. و لو جيتى تتكلمى هتلاقى العبارة الصادمة : " ما كل الامهات كده و شغالين و مخلفين بدل العيل 3 و 4 " .
عزيزتى الفتاة : و حياة امى انت فى نعمة .. طبعا مش هتصدقينى بس عارفة اللمبى فى فيلم اللى بالى بالك لما قالها : اللمبى كان فاضل له يومين و صورته تنزل على الجنية .. بس يا خسارة دخل فى بوقة واحد " هو ده احساسى بعد الجواز .. المشكلة مش فى الزوج المشكلة فى سيستم الجواز نفسه و فى رصة النيش .. يا تتجوزى و ترصيه بنفسك يا هيترص لك بمزاجهم .. انا رأي : بلاش نيش اصلا .. يولع النيش
