أنا فكره
أنا فكره ف عيون العيال
مستنيه ضحكه تطل
تبرز سنان اليتم ف القطبان
يضحكوا مع فك مسمار القضيب
وصنع خراط المدافع ف الصيام
فكره عيالى جدا
وتشبه للنسيم الأصل
إعلان الخروج ف العيد
من حق أطفال البيوت
يملكوا الشارع
ف لحظة حدفهم بالبمب
يخلوا أسطول الكئابه المستعيذ م الفصل بالجمعه
يبتسم ف الحوش بلعب الطيش مع الكوره
وحدف الرمل ف عيون السحاب
ينفعل ألة كمان
أو ف حصة رسم ريشه تنطق بمسح العنكبوت
صوابع أورج وحدانى
بينسى التون وخفة عزفه كالأطفال
جموح أطفال يبان جداً
ف وقت اعلان الجرس خلاص إفراج
فيتلون فراغ بوابة الهنجر بلونى البيج
يكون جدى ف حصة شرح أشعار التراث أستاذ
نقوم طبعاً أنا وكل العيال للديوان ننحاز
أنا فكره ف عيون العيال
قادره تخلى الصيادين
يتبنوا تمكين الشبك م الصبر
يشوف أيوب من الجنه
فيتعلم ويوصفها دليل الصبر
أنا فكره لابد تكون
كما صوت الأدان
وسيرة يوسف الإنسان
وشوف بير اللِعَب أنا فيه
أوطان بيخلى كل الناس كما التنوره ف الأحساس بلون واحد
يبان بهتان من الدوخه
أكون بهدوء علب الوان
وكل بنات حوارينا تدوق الحجل مش كتمان
تعيش حوا كما الأطفال
لأن الأرض مش جنه مع أدم
نشوف رابعه تخش السيما ف الوايلى
وأيد بابا على آسيا ف نط الحبل مش آسيا
وأيه يعنى بنا بشعور
بنات طرحه
أنا عوز البنات فرحه
وضحكة ام تعبانه ف رص الصاج
بدوس الطفل ع الكحكه
ودوس الطفل مش دانه
أنا هي ف دق الزار
بترفض أى تعويذه ولو فيها حلول الحمل
بتؤمن إن شجر التوت
بيتمتع بحدف الطوب من الأطفال
تسمى إبنها عيسى ف مولد خير خلق الله
أنا ضحكه بايته ف عيون العيال
من صيف قديم ف إسكندريه
وضحك رمل الشط ويا رجلين الصغار
ظلم ملح البحر والأمواج
طفى ف عيون الفرح صاحب عزيز
بس مكرهتش
شطوط الصيف
وضحك الرمل
وخيط طيارتى فوق الملح
أنا والخروج ع الصمت عاده
خيط بيربط كل شىء
بيشبه ف الحياه
ضم السما للكون برفق
لكن سؤال بيعطل الإحساس تملى
ناعمه السما وألا فيها جبال بلون لبنى ؟
مش باينه ف الصوره .............
