ف انتظار تفسير
شوفت السجون فاضية
والمسجونين أحرار
المسجونين عاصيين
ع القيد وع الأغلال
المسجونين ...
أفكار
شوفت البطون خَضرة
شوفت الرَّحِم بُستان
مليان شجر وورود
فصل الربيع دكتور
بيخرَّج المولود
شوفت الوطن مغناطيس
جاذب عيال حواليه
جاذب تجاهُه كتير
عدد العيال بيزيد
طلعوا العيال مسامير
شوفت البلد مَقلمة
بتزيل معاني اليأس
وبتكتب الأحلام
شوفت البلد مقلمة
فيها العيال أقلام
شوفت المُحال بيجوز
شوفت اللي جايز
صار
شوفت اللي حاكِم مصر
واحد من الثوار
وده كله كان ف الحِلم
وانا حلمي كان رؤية
والرؤية من ربنا
وأكيد فـ ده آية
سيدنا النبي يوسف
فَسَّرْلي رؤيايا؟
السبعة العِجاف عندنا
إتضاعفوا بزيادة
مُشتاق لحبة سكر
على قهوتي السادة
سيدنا النبي يوسف
هل حلمنا المذكور
هيعيش ف يوم ع الأرض
أم صَبرِنا السُنَّة
هيكون علينا فرض؟!
سيدنا النبي يوسف
هل تفتكر ويايا
إن السجون تِفضى؟!
إن النفوس تِرضى؟!
سيدنا النبي يوسف
أنا كيلي فاض بيا
وزهقت م المكاتيب
أنا وَجَعي مش عُضوي
وعلاجي مش ف طبيب
سيدنا النبي يوسف
أنا توهت م التفكير
سيدنا النبي يوسف
أنا ف انتظار تفسير
