قال " خساره " .. | محمد مصطفي

..

قال " هسافر "
ساب حبايبه و ساب صحابه
حتى قلبة نساه و سابه
عاش سنين يجمع فلوسه
كل يوم فـ الغربه وحده
و السهر طبعه و عهده
و السفر كان الحرامى
كل يوم يسرق فـ وقته
كل ساعه و كل ثانيه
عمره عدى و فـ ثوانى
شكله أصبح حاجه تانيه
و الفلوس لما وزنها
الحياه كانت تمنها
فـ افتكر ايام شبابه
حس روحه بره جسمه
حتى قرب ينسى إسمه
ذكرياته الحلوه ماتت
كل حاجه ريحتها راحت
الحكاوى
و القهاوى
و الشوارع
و البيوت
قلبه مليان بالحنين
عمره هربان م السكوت
من عيونه الدمعه نازله
و افتكر أيام زمان
* السفر كان مادّه عازله *

..

قال " هعود "
دا السفر مالهوش وعود
عمره كله راح بلاش
لما دوّر جوه نفسه
إكتشف إنه مجاش ،
و أما قرر إنه يرجع
كان خلاص فات المعاد
راح لصاحبه زمان - زياد -
كان زياد بقى شعره أبيض
ضهره مقسوم م الهموم
كله بيلوم ع الزمن
و الزمن على مين يلوم !
أما شافه .. راح و حضنه
الدموع من عينه نزلت
حس إنه روحه رجعت
و افتكر أيام زمان
قالله فاكر ..
لما كنا ف الميدان
ولا فاكر القصايد و الكتابه
* افتكر كل اللى كان *
- فاكر البت اللى كانت تشغلك طول الليالى
فاكر أما مسكت إيدها !
= أحلى أيام عمرى يابنى
نفسى أعيدها
- فاكر القهوه و ثانوى
= إنت فاكر إنى هنسى !
= طب و فاكر عيد ميلادى
- عيب يا صاحبى .. ٥ / ٥
= طب و كان فين ذكرياتك
دانتا راجع بعد لما العمر فاتك !

..

قال " يارتنى "
ذكرياتى خلاص نستنى
- إلا قوللى .. فين صحابنا !
= كل واحد راح لحاله
اللى سافر
و اللى عافر
و اللى عايش نص ميت
و اللى راح سكن المقابر
- حد مات !
= ناس كتير ماتت يا صاحبى
كل حاجه حلوه ماتت
الدموع معادتش تنفع
كل ذكرى حلوه راحت
- عايز أشوفهم
= طب تعالى تشوف حبيبك
- مين حبيبى !
* راح لقى راجل عجوز *
- انت عم الحج طاهر !!
أيوه يابنى .. إنت مين ؟
- مش عارفنى !
قالله آسف .. أصلى أعمى من سنين
* الدموع ف عينيه بتضحك *
الأسف أوقات بيبقى
حاجه توجع متداويش
قالله مالك يابنى ساكت
قال - مفيش -
إيده تمسح من دموعه
قلبه تايه م الحنين
و إستفاد إيه من رجوعه
غير وجع ساكن ضلوعه ،
و أما راح بيته القديم
قابله واحد قالله آسف
ماتوا سكان العماره
قال " خساره " ..