أحكيك لمين؟
يا سر اكبر من علاقتي بأي حد
يا جحود وغربة وموت ووجد
محتار بجد
أحكيك لمين
يا ابن المسافات والحنين
يا مسابق الوحدة بسنين
صاحبك قتيل الذكريات
واقف على باب السكات مليان كلام
انت الزحام في صراعك المليان بشر؟!
ولا انت مش قد الزحام
يا صمام أمان الغربة في الليل الطويل
حملك تقيل
مابقيتش سايعاه الكتاف
وبقيت بخاف
لتْقُولَك العين للعَوَام
من كتر ما أنينك بيقلق مضجعي
مابقيتش من صوتك بنام
