اعذرينى
هشام صبح
اعذرينى
لسه بحلم
انى يوم هقدر أقولك
افرحيلى من جديد انا بتولد
انك انتى يومها بس هتقدرى
تفتكرى فرحتك بالميلاد
من بعد أوجاع المخاض
اعذرينى
لسه أحلامى طفولية مبعترة
على رمل الطريق
اعذرينى ان مبوستش التراب
اللى بتخطى عليه
تبقى الحقيقة مزعجة
تبقى مليانة بصداع
تبقى مليانة بزغللة
يفضل الوجع ساكن ملامحى
وتلاقيها مجهّمة
يفضل الخوف ساكن فى قلبى
يفرتكه
تفضل الأوهام تروح و تيجى
زى ضيف سئيل جبان
لسه خوفى م الجيران
يهتكوا سترى و سترك
أو ينولو من خضرة الشريفة
زى عادتهم زمان
لسه اوجاع المخاض
أقوى من صلب العيدان
لسه رسمى ملوش ملامح
واضحة زاهية للعيان
وان يعاينو يشمو خوفى
ملو جوفى
مانع الحروف توضحلك بيان
اعذرينى
الدنيا قاسية
اعذرينى مشاعرى جافية
اعذرينى كتير يا صالحة
لسه أيامى طارحة
شوك و خوف و مر علقم
اعذرينى حتى فى عز الكلام
مضطر أسكت
خلص من عقلى البيان
