رقصة
هشام صبح
رقصة
ثبت زعبوطك فوق راسك
اتدفى و لف حبال الروب ع الوسط
قوم و ارقص على كيفك بعصاية
أدام الباب
يمكن تنفض عن روحك
تعب الأيام
و كلام لا يودى و لا يقدّم
و كلام بيشدك للعتمة
تغرق ويّاه
اوعاك تنساك
و تسيب أشواق تدبل جواك
لا الحلوة هتحلم يوم غير بيك
و لاتحلم غير بهواها فى يوم
و اهو يوم ورا يوم
أيام بتعدى و تتسرسب
فى حبال الغيب
بتجر وراها سنين و أحلام
و ان مرقصتش مرة اليوم
امتى هتقوم؟
و ازاى من عمر الدنيا فى يوم
هتكون الفارس و الخيّال
و انت طول عمرك حبيت تهرب
لجل ما تنساك؟
