حلم
هشام صبح
علمنى طبعك أطاوعك
يا منى عينى
و اوصف طريق الهوى ليا
و انا أمشى عليه
(موال شعبى)
......................................
غمزت بعينها
تبعتها
طال الطريق بينا
سألتها
ان كان طريقى فى ضلها
أمشى سنين العمر
ما انتهى
يوصل ما بين شطين
الهوى
جاوبت بهمسة حنينة
جنية أنا
لو تهوى
راح تهوى
ما ترتوى
مسحور كضل تبعتها
مالت على الصحرا
طرحت جناين جنبها
مرت ورقصت بين ورودها
سألتها
مين علمك بلمسة تسحرى؟
فاتت ما ردت ع السؤال
"ان كنت غاوى
تلتزم الادب
و تطلب جواب للى ملوش خبر"
فاتت و مرت فوق جناين عامرة
سحرت نواطيرها
دابوا سراب من حولها
دبل الحبيب
أمرك عجيب
لكنى منها ما خفت انا
مفتون بهيّة
آمنت انا
يا أم الشعور السودة
دبلنى الغرام
زاد الهيام
ليه الورود اتدبلوا؟
"لساك بتنسى تلتزم الادب"
قلبى غلب
و احتار فى فهمك يا صبية
ساحرة؟
"طال السؤال منك و لاعنديش جواب"
هتبلى ريقى فى آخر الطريق؟
"يمكن كمان تموت غريق
و لا ترتوى"
مديت خطاوى
سبقتها
يمكن لدربى أشدها
مالت على جنب الطريق
شب الحريق
فى القلب
ميلت أطفى نارى بالعتاب
جانى الجواب
بلل براءة خدها
و اتشققت أرضين ما بينى و بينها
هميت
وصلت لدمع عينها
لمستها
راق الضباب و بسمة اتفجرت
على شطها
رقصت تطيّر العصافير من عشها
رقص وجودى حولها
اتفجرت ألوان الفرح دايبة فى النسيم
ويا القمر
قربت منها
أضمها
مالت و فردت جناح الشوق على بحر السما
غابت و راحت للعلا
ما قدرت أكون فوق جنبها
لمعتلى نجمة بضيها
غاب القمر كسيف من ضيها
همستلى حانية فى السكوت
ان كنت غاوى ترتوى
ارحل و دور فى الصبايا الحور
دا العشق فن ملوش دوا
قلبت بين الصبايا
لمحتها
طفلة بتحبى فوق قلوب متجمعة
غنيتلها
"شاله أحمر يااما خالص
لونه من لون الطماطم"
