اخر مرة قريتلك حاجة
أحمد سلامة
أول مرة قريتلك حاجة
كانت قهوة بطعم السكر
قلتي انا بعرف أكتب : قهوة
لكن إنجليش
أصل العربي بتاعي مكسر
قلت وماله
انجليش انجليش
وده ما يضرش
قهوة قلبك تبقى زيادة
وانا كالعادة
طعم القهوة في قلبي ممرر
قهوة قلبي بطعم الدنيا
قهوة قلبك
طعمها دنيا
يبقى تمام
حاصل ضرب القعدة معاكي
بعد القسمة على الاتنين
فنجان دوبل يكفي اتنين
طعم الدنيا معاه مظبوط
ثم الحب عملها معاكي
ثم الحظ عملها معايا
قلتي اكتبـني
وقلتي اكتبـني
ثم قعدتي تهدي وتبني
قمت كتبتك
واما قريتي
قلتي كلامك حلو مسكر
بس في سرك
قلتي كلامك شكله مكرر
واما طلبت حساب القهوة
قمتي هربتي
ثم كتبتي
واما قريتلك
عمري ما كنت حقيقي اتصور
اخر مرة اقرالك حاجة
كانت :
" !!! يالله .. سلام .. هتأخر "
