فى هيكل الذاكره
أسامة سند
يمكن
يجوز
شئ محتمل
أعْديكى من جرحى
وأعدِّيكى اللى فاضل من عذابات الأمل
شكل الحياة
الضحكة
مسرح شيكسبير
غناويكى وإنتى بتستحمى بلمستى
خناقاتك اليومية مع عقب السيجارة
وإنتى بتمصيه
وهوا بيشربك
طعم البراندى وهوا ف لسانك
وأقواس القزح ف عنيكى
وإنتى بتلعبى بإحساسى
صياد السمك
لون المخدة اللى إحتلم من عقلك الباطن
سواد الذاكرة
لحظة تفاؤل
سرفلت تيير خدودك
من فتل شم النسيم
دم الطماطم
لما تنزف بين شفايفك
متعة الفخ اللى حن على الفريسة
لما بصت له بحنانها
فإحتضن فيها الأنوثة
فإحتضر فيها اللى باقى من المقاومة
مين يقول العشق يخضع للمساومة
والملاك
اللى إتفطم تسبيح
يسلسل روحه فى حبال من مسد
وأما الشموع تنزف دموع
بتعيد فى تكوين الجسد
يمكن
يجوز
شئ محتمل
قلبك يتوه فى السكه من غير ما التقيه
وساعتها بس هتعرفى
إحساسى وأنا جوا المتاهه
يبقى إيه ؟
