عينيكى
ضياء الدين ضياء
عينيكى البحر و الغابة
سمك الوان على ديابة
هوا منعش
و فجأة النوة قلابة
ملحك يشربوا شجرك
ف يعطشنى
وانا اتجسد .. مطر ف سحاب
اجيكى ..اسقيكى.. ارويكى
ما تستكفيش
و اية اعمل
و روحك سوس و متصابة
عينيكى السر و التـأويل
جريمة كاملة التفاصيل
ملوعة و كدبها عشرى
و لة تأثير
بس انا رب العباد
خلقنى الة
بتاع تمثيل
عينيكى السكة ف المتاهات
قمر بيصلى ف السماوات
طريق بيقص المسافات
لكنى محترف توهة
و كافر حب
و متوزع خطاوى بتسكن الطرقات
ف قلبك مش مكان قدى
مابيسعنيش
براحك ضيق بيخنقنى
مابيكفيش
ما انا ونفسى كتار جدا
و صعب ف قصة واحدة نعيش
