تالت حلم يمين
أحمد البوهي
أنا بِعت الحلم لناس تانية
وجبت بـتـمنه حاجات تانيـة
حاجات معرفش منين وازاي !!
والحلم آهو راح واختار صاحبه
مستني أشوف الحلم الجـــــــاي
محتــاج لبراح وهكون صاحبــــه
مستنـي الضحكة تشيل هـمِّـي
والصبر آهو يسند وقت الضيق
أنا كنت خيـال وسط الـماشيـين
أنا ضل وســاكـن ألـف طريـــق
من ضمن حاجاتي اللي لقيتها
كان حلم لواحد مــــاعرفتوش
ولمحت حاجات كنت نسيتها
واتحقق حلم أنا ماحلمتــوش
وخدتـني الدنيا في سكتها
لبيبان مفتوحة وسَــكـِــتها
أوهام الناس والخوف م الليل
والخوف والليل بيـنهم أوجـاع
والهدنه نهار ..يبدأ بشروق
ونهــايــــته وداع
والليل فلسفته بتتحقق
بتخاف على حلم مايـتحققش
وتـخاف ..من حلم ليـتـحـقـق
الحلم الأول في حيــــاتك
كان واحد تاني بـيـتـمناه
والحلم التـاني اللي حلمتـه
كان واحد تالت فجـأة لقاه
وتعدي سنين من غير نفسك
وفـ آخر السكة تلاقي نفسك
بتحقق حلم على يـمينك
ولا مرة اتقــال
والقلب ماهوش زرعة إيدك
ده النبض شمال
والحب طريق من غيـر آخر
والصبر محال
مع إنك صابر طول عمرك
وطريقك مش يـمة حلمك
هتعيش مجذوب تنشد وهمك
غنوة وموال
