مزيكا شرقية
هشام صبح
شيللاه يا سيدى ابراهيم
مدد يا حى يا كريم
يا جابر العثرات
يا رافع الهمات
حى و لكنه مات
ميت و لا حييشى
ماشى..ميمشيشى
آتى..و لا يجيشى
ناطق ميتكلمش
الصمت لَغواته
كتر الكلام لغُواته
و الوقت ساعاته
أعمار ولا بتنقصش
دار الزمان دوره
والكل حين دوره
ييجى ميتأخرش
ييجى على مهله
ولكل بيت أهله
غيره ما راح يسكنش
أنا الفقير ليكم
سعيى بأياديكم
أنا الكمال بيكم
و بغيركم يوم ما أحسنش
شيللاه يا جايب اليسرى
أمرى صبح عسرى
افرجها يا الله
يا محسنين لله
امتى الفرج ييجى
ألوانه تباشيرى
على بياض النور
و النور من العتمة
خيط له جمال أبيض
من السواد يطرح
فرحى و تفاريحى
خليك هنا فى ريحى
قرب و لاتبعدش
يا حلم يا وسيع
املا الوجود ببراح
دا كل آت راح
ولى ولا بقيشى
سوى أنا و انت
امتى الزمن امتى
يحسن ولا يبخلش
شيللاه يا جيلانى
مدد يا شاذولى
جانى الخيال خيّال
راكب خيول الحال
فى الحل و الترحال
نوركم هنا دليلى
يا ويلى يا ويلى
لو يوم يقل النور
و ان جه عليا الدور
أغيب و لا أغيبشى
عن حضرة المحبوب
قلبى الحنين جابه
و الخوف خلاص سابه
قلّب فى جنباته
كم حى ولا ماتوا
سكنوا خراب الدار
عمّروا و عمروها
أيامى فاتوها
أعيشها من موتة
عمرى صبح نوتة
مزيكا شرقية
لعب القانون لعبة
قسم بناياته
صبا على نهاوند
و الاتى طبعه حجاز
لسه البياتى ما جاز
جايز ولا يجوزشى
سوى السماع الصمت
