بيحب الحياة
هشام صبح
اعذرينى
ان قلت حبيت الحياة
جوه زحمة
جوه زفة فى قلب مولد
م الموالد اللى سايرة
رايحة جاية فى الميدان
جوه حارة فى قلب حارة
جوه شقة
عمر نور الشمس مايزورها فى يوم
اعذرينى أصلى جبت
للوجود خمسين وليد
جنب منهم أربعة
م الولايا اللى كانوا فى يوم
بنات
اعذرينى أصلى راعى
لو تراعى
لهفتى لجل أرجعلهم
بالسحور اللى استلفته
من كتير ولاد حلال
اعذرينى الفجر قرب
لازم ألحق
دوغرى و أهرب
لجل انام
بكره يوم فى الشغل صهد
و انتى عارفة
لو منمتش مش راح أصحى بكرة فايق
وانتى واعية
للمكان أصحاب شداد
يقطعونى
يمنعوا عنى الهوا
اللى أصلا مملكوش
اعذرينى الراحة واجبة
و ان وقعت
مش هلاقى حد يسند وقعتى
ابن خالتى وعمتى
لسه واكلين الميراث
معذورين
ماهمّا برضه لو سابونى
بكره يلقو ديّانتهم
ع الحدود متربعين
عمى مات فى( غزة )لما
كان بيستر عرض بنته
من حرامى كان فى بيتهم
ساب جارتهم
لجل شافها مرة واقفة
ويا عزوة من الشباب
اعذرينى حياتى حلوة
اعذرينى سجايرى غالية
مش راح أعزم ليكى منها
بكره ترخص
أو هتغلى
مش هتفرق
بس برضه لو تشوفى عزرائيل
قولى بيحب الحياة
شفتى أهوّ الفجر أذن
هلحق أشرب بق مياه
والا أقولك
يعنى هى جت عليا
ليا عذرى فى الفطار
