كونشيرتو على سلم الجنه
لو تسمحى فتسنحى
فتمسحى دمعى اللى نازل
مستحى
وبشكل هزلى
ومسرحى تخلينى أرقص
أتولد من تانى
زى المهر أرفص مطرحى
تسقينى عمرى تشكلينى
ترسميلى ملمحى
اه من معالم بسمتك
من ملمسك
ف نهودك الصلصال كأنى ف محبسك
جهنمك
ليه عايزه قلبى المنهمك ف عنيكى يسرح
بين كيانى ومعجمك ؟
بين كلمتين
وحرف جر وحرف عطف ولام جحود
وتاء تؤنث فى محل سحل مفعول بيه
مخنث .. أوغبى
وجيت أزورك يا نبى
ياللى بلادك طيبه
فيها الحبيبه المتعبه
تسند رموشها الملهمات الملهبه
تفرشلى كحك العيد وهيا غريِّبه
للصبح عند المصطبه توزع شروق
والليله لو سكرانه روحى ف غربة الأشواق
تفوق .
والليله لو شرقانه عطشانه لحنان
لازم تدوق
ساقط فى درس النحو والتعبير
ومش عارف
مكان إعرابى فين بالظبط منك
والكفوف أوتار جيتار
والقلب والع زى رقصة الفرس
فى دقة المزمار
وزى حيطه بتتشرخ من دقة المسمار
وزى عيل فى إبتداءى
لما يتفاجئ بملحق
دمعتى ف عينى الشمال
بتسابق اللى نحيتك
فتصبريها بضحكتك تسكت
وتتحول دموع جوايا و ف صدرى
ف مش من بعد آخرة صبرى
يتمد الطريق قدام خطاكى
وترحلى
لو تسمحى وترَّحلى الأيام
ونرجع بالزمن لسنين ورا
مكانش قلبى فيه حاجات متبعتره
وكنتى لسه صغيره وعارفانى
من ريحتى
وكنت بعرفك
لما الرياح بتغير اتجاهها
كنت أحس بوجودك على بعد الطريق
واما تشوفينى تلمسينى
تطلعى من بين شفايفى وتشربى
وجيت أزورك يا نبى
ياللى بلادك مش هنا
فيها الحبيبه المحزنه
فيها الجراح المزمنه
جايلك بكل ضعفى والأمانى
المستحيله
واللى منها ممكنه
أرجوك تكلم ربنا
يمكن يرجعها
"آمين"
