أغنية صغيرة
عن بسمة الصغيرة
زين العابدين فؤاد
بسمه ما بتعرفش تقرا
بس أنا هاكتب قصيده
عن قمر كان أصله شجره
وأتزرع فى بلاد بعيده
بسمه تعرف بس بابا
حتى ماتعرفش اسمه
والورق مليان كتابه
والقمر بسمه فى رسمه
بسمه تعرف بس ماما
لما تخرج ولا تحضر
والقمر كان يوم حمامه
وزى بسمه- برضه- يكبر
بسمه تعرف بس تضحك
يبقى كل السجن شمس
لما طرف صباعها يشبك
فى الجماد، ينبض، يحس
بسمه جاتنى فى الزياره
دنيا مسحوره جديده
زلزلت سجن الحجاره
آه، بضحكتها الوليده
بسمه ما بتعرفش تقرا
بس بكره، بسمه جيل
جيل بيزرع مصر ثوره
ينهى مشوارها الطويلة.
