غريبة
هشام صبح
مابين عايقة
وبين رايقة
و مجذوبة
صبحت فى نار
لا أنا واصل
ولا مفصول
و أمد القول
تنام جنية على صدرى
و تغمزلى
تبصبصلى
يسيل الشعر على كفى
كما الانهار
يدوب حسى فى تفاصيلها
و اتوه عنهم
و اتوه منهم
و ييجى الصبح من تانى
تغيب تانى
و أدق الزار
متحضرشى
تقيد نارى
فى كل طريق
و يتقادلى فى قلبى حريق
رفيقى الصبر و الغنوة
تصير موال
و ايه يتقال
لو أملك امرها فى ايدى
أسلسلها
ألجّم مهرها السارح
هنا فى قلبى
متهربشى
و لا تغيبشى
ولا تفوتنى
أصبر دنيتى بأوهام
و أعيش حالم فى تغريبتى
يا حور الجنة دلونى
العشق كيف يكون لى دواه؟
