عيل
هاني مهران
"يا طالع الشجرة
هات لي معاك بقرة "
- إزاي البقرة
تكُون من فوق ؟
- ششش
"نام يا حبيبى نام
وأدبح لك جوزين حمام"
- ما بحبوش
- ششش
"أنا الديك الأخضر الأخضر
أمشي ع الحيط واتمخطر "
- إزاي الديك بيغني؟
وإزاي الديك يبقى أخضر؟
***
- يوووه
- من صغري بفكر
ما تعديش كلمة فـ حدوتة
أو غنوة
غير لما أعقلها
وأتْدَبَّر
إزاي أستنَى اللبن الأبيض
من بقرة عايشة على الشجرة؟
إزاي التعلب يتكلم
وإزاي الفار الطيب فـ الحدوتة
أما أمي تشوفه بتجري وراه
وإزاي الغولة
ما تبقاش غولة فـ عز الشمس
وتتحول للناس بالليل
وإزاي ؟؟
وإزاي ؟؟
وإزاي !!
وإزاي !!
وأما كبرت
وسمعت الأخبار فـ النشرة
عرفت سياسة
صدقت
وبطَلت أفكر
