لما تحب تفضفض من قلبك
وتشيل الصمت ...
عمرك ما بتعرف تحكي الموضوع بالظبط
طول عمرك كنت تشيل المؤلم م الموضوع
وتسيب الجزء اللي بيبقى لطيف ..
طول عمرك غاوي الحكايات
بس على خفيف..
كلنا عندنا حكايات ما بتتقالش
كلنا من كتر الهم نموت في القلش
أنا عمري ماكلمتك عن نفسي لحد الوقت
أنا عمري ما قلت الموضوع بالظبط
الفكرة ان انا فعلا فاشل جداً في الناس والوقت
.. انا كنت لغاية تانية اعدادي ألدغ في الـ "ر"
فطلعت بخاف اتكلم مع حد عشان الضحك بيجرحني
انا بكتب شعر عشان اتعالج
مش علشان حبيت الشعر
انا بضحك من عقدة قديمة مش علشان مبسوط
بتعصب جدا بسهولة .. عشان بنسى بسرعة
بطلت سجاير مش علشان مأذيش نفسي
لكن علشان كنت بصالح "نون"
بتأثر جداً من مشهد طفل وأصحابه بيستقووا عليه
مش علشان حساس ورومانتيكي
لكن علشان بيفكرني بنفسي وانا صغير
انا لسه بخاف م الضلمة لحد الوقت
عشان فيها من المبنى المهجور اللي دخلته وانا صغير
انا بكره كل مواد رياضة
عشان الميس زمان ضربتني عشان الواجب
..
وأبويا اللي بخاف اتكلم عنه
عشان ما افسدش المعنى
انا عمري ماقلت اني مجرد صورتك بس على صغير
انا عمري ماقلت اني فخور جداً بيك
بيني وبينك حلم ماقلتوش
وعيون اتأثروا جدا
لكن مابكوش
يمكن نوع من فرض الجدية على المشهد
علشان ما المحش دموعك
واقدر اميز إحساسك
بس انا أكتر واحد عارف إنك أب حنين جداً
لكن بتبان متماسك
..
حبيت اكتب وافضفض من قلبي
عريت الجرح بدال ما ابكي
عيطت بدون ما احكي
كل ده علشان الشعر اللي فاضحني معاه فْ كل الحكايات
وكأن الشعر مجسد مايك الشيخ حسني ف فيلم الكيت كات ..
..
انا قلبي خفيف
فبشوفِك طيف
انا لسه لحد الآن ما بمرش م الدور التاني ف مبني حقوق
علشان لسه بخاف المح طيفِك
انا دايما بتكلم عنك على إنك ذكرى جميلة
وطيف م الأحلام الوردية
مع إنك أسوء قصة حب ف عمري
انتي الحلم اللي انا ما حلمتوش
إنتي القصة اللي بخاف منها
أنا عمري ما كملت حكايتك للآخر
....
ماحكيتش عن الولد الطايش ولا مره
كان له ف كل كتاب بنوتة
وكل يومين حدوتة
انا اكتر واحد قال في قصص مش حقيقية
وساب الحقيقية ومحكاش عنها
الحب كتير كان شماعة بتتعلق ع الشعر
انا اكبر كذبة وجرح ف قلب البنوتة الـ "ميم"
انا اسف علشان حبيت الشعر ف أحلامك
انا اسف علشان شوفتك ملهمة
وساعات نزوة
وساعات – أنا آسف جداً – شهوة
انا بفرح واحزن
وبحب وبكره
وبسيب واتساب
وساعات مجروح وساعات جارح
ماقدرتش اخبيكي ف ضلعي فموتتك من غير ما اقصد
أنا اسف
ماحكيتش الموضوع بالظبط
#مصطفى_حسان
