خلاص حارجع
أخانق روحي في العتمة
والوم نفسي وأنّبها..
على كلامها
وعمايلها
وقالت ليه..
في وقت اللي وَجَب تسكت
وعادت ليه..
في يوم اللي لِزم ما تعيدش
وبعدين فيكي يا خايبة؟
وآخرة قلبك الدوغري؟
وآخرة عقلك الدوغري؟
وآخرة عيشة كدابة
تشوف الحق.. تقوم تجري
يا سيدي.. لا الكلام فضة
ولا كَتم الكلام مُدهَب
ولا قول الحِكَم ألماظ
ولا حُكْم العقول زينة
وخلّينا
نعيشها ثانية ورا ثانية
وما نفكّرش
وما ندوّرش
وما نحكيش
عن الأوجاع
عن الأوضاع
عن الباقي
عن اللي ضاع
بلاش نشكي
كده أحسن..
ماهو لا الشكوى بتداوي
ولا صوت البكا بيشفع
فهل أرجع..
أخانق روحي في العتمة
على الفكرة.. وعلى الكلمة؟
كفاية كده
أنا حاسكت
...ولو كان السكوت
ببلاش
