زي كل سنة
ملك الموت فتح دفاتره وكتب اسامي غالية علينا
نقلها من سكنها وخلاها تغير عناوينها
وتسكن في قلوينا وعقولنا وضمايرنا
مش هاكرر حصاد السنة المر
لكن اكرر ان : " ما عندناش حد بيموت "
اللي بيعيش في عقل وقلب الناس ما بيموتش "
وزي كل سنة
المأذون و القسيس فتحوا دفاترهم وسجلوا العرسان الجداد
وخلقو لينا لحظات فرح
و زي كل سنة
مواليد جديدة صرخت في وش الحياة وسجلت حضورها
وزي كل سنة
كل الناس بتحلم بالحرية
وزي كل سنة يموت ديكتاتور وييجي بداله الف
لكن اللي مش زي كل سنة :
هو الدمار اللي بيغطي غزة و سوريا واليمن والعراق و ليبيا
هو ملايين الاطفال اللاجئين واللي ما بيرحوش مدارس
هو الجوع اللي بيضرب بسيفه
هو الجهل اللي بيحكم باسم الدين
او باسم الخوف علي الدين
او باسم الخوف من رجوع الماضي بصورة من الصور ،
فيخلونا نعيش في الماضي بابشع صوره
زي كل سنة
/ بالنسبه ليه علي الاقل من41 سنة باقول
" اتفجري بالحرب ينطلق النهار
تفجري بالحرب ا
: ضد الجوع ،
وضد القهر،
ضد التتار
و اتسلحي للحرب : بالحرية
واتفتحي ورده بدم ونار
واتجمعي من الف صرخة وضحكة
و الحرب لسه : في اول السكه
والثورة لسه : في اول السكه "
طولت عليكم
اسف
اصلها مش زي اي سنة
زين العابدين فؤاد
