‫#‏سامحونى‬ | أحمد الحديدي

Written By Unknown on الثلاثاء، 13 يناير 2015 | 6:41 ص

سامحونى لو شكلى غلط
لو مرة شوفتوا ف بقى أكل من الزبالة
ما تقرفوش
سامحونى لو عشان أعيش سوقت الهبل على العبط
عارفين مرار اللقمة حاف على حلق جاف؟
ما تعرفوش

(انا طفل عادى زيكم كان ليَّ أب وأم
حظى وحش فجأة التقيت عينيََّ
مش بتشوف
سوى شلة من العيال هدومها تنشع دم
ماخترتش ابقى فى الشوارع
ولا حتى اكون مخطوف)

لو تعرفوا العمر بيعدى عليَّ إزاي هنا!
الوقت عندى باحسبه
بالكيلو مش بالساعة
أنا اللي نايم في الخرابة
مخدتي غطى بتاع بلاعة
أنا اللي بغرق في جشعكم طين
وطالعين فى البرامج باسمنا تنوحوا
فضائية أو ف إذاعة
أنا اللي ماليني الغضب بنزين
وانتوا الطموح ف عنيكوا ميت ولاعة

أنا الفقير اللى خرب هذا البلد
أنا اللي بتقولوا عليه تضخم السكانى وانا يعني محسوب - قال - عليكم ف العدد؟!
في الهم انا محسوب عدد ؟
في الهم بس !

طب إنتوا محسوبين عليَّ إيه صحيح ؟
يعنى إنتوا مثلا حبة كسور ف الحزن وانا اللي واحد صحيح

واذا كنت انا حمل وتقيل
اشمعنا انا بس اللى اشيل؟
يعنى ما فيش غيري أصيل
ولا انتوا شايفيني
عشان فقير ضعيف أبقى بديل؟
سامحوني لو –لامؤخذه- كان ديلى قصير
والله ماشي في الحياة دي غصب عني
في اتجاه والدنيا ما شية عكس سير

احنا اللى حبينا البلد وهى ما بتديش
هما اللى واكلنها--
وسرقنها--
وفاسدينها
واحنا اللى حامدين ربنا سابونا فيها نعيش

حتى ف تاريخك يا بلد مالقتش اسمي فيه
طب افتحى لنا باب على بكره
احنا اللى بندوب فى هواكى / ليه؟
لا أخدنا جنسية ولا... فكرنا في هجرة

‫#‏احمد_الحديدى‬

الشاعر المهندس احمد الحديدى