عيال قلوبهم نبتت بدري
قاموا صدقوا الكلمة اللي طالعة من الحياة
وقالوا نكتب فيها شعر
نفس العيال جم شاخوا أسرع م الهوا ف ليلة شتا
فاتصدموا من إن الحياة شاخت وباخت
وبرده كتبوا الشعر فيها
وكإن هو الشعر يعني اللي الحياة فيه مش حياة زي الحياة
أو هو طعم الجنة ليلة ف عمر نار
لكن هتسأل:مين سمعهم أو ف يوم مين حسهم ؟
هاقول :مفيش.
أنا حتي مرة سألتهم
قالوا:الكتابة عشان نعيش.
عيال بقا
عيال قلوبها معبأة .. بالريح
والريح بتاخد م البلاط إيه غير تراب
ومع الشتا ..
صبحت قلوبهم طين جديد ..
فاتنبتت.
قاموا صدقوا
ف المرة دي جم صدقوا كل الحاجات؛
طعم الفرح علي نكتة بايخة
طعم البكا بصدق ف فرح
وصوته وقت الحزن برده
الصحبة دايمة والقريب يسعد
الدنيا سهلة والصعاب غايبة
لهفة عيال علي واد صاحبهم لوح إزاز خبطه.. اتجرح
نظرة بتتأمل جنايني كل يوم يحضن ف ورده
الحب قرب اما الغريب يبعد.
_عيال قلوبها مصدقة_
عيال بقا
تصدقوا دول صدقوا .. إن الكلام الحلو حلو
ولو قالوه ف الشعر حلو
هيبقي حاجة مفرحة
فقالوا مثلا:
"إحنا اتولدنا ف لحظة تشبه شمس لسه مفتحة
هنعيش نطير بقلوبنا مش باﻷجنحة
ولو وقعنا نقوم نشب بقوة تاني
نرفع إيدينا عشان نودع شمس ماشية مروحة"
وف يوم وبعد ما ودعوا الشمس .. استخبت
معدش فيه نور أو دفا
ضاع الزمن .. صبحم كبار
أكبر من الزعل اللي عاش جوا البشر
بقوا يستخبوا ف بعضهم ويقولوا بكرة الشمس تيجي
_وبكرة نفسه معدش جه_
لاكنهم ف المرة دي جم صدقوا كل الحاجات
إكمنهم عايشين بروح أطفال بتمسك ف الهوا
(أو ف الفراش .. هما شايفين الفراش)
ومش هقول إيه صدقوه
ومش هقول إيه لما حسوا ان الكلام الحلو حلو ..ألفوه
لاكن هقول ..
إن العيال دي ..
عيال قلوبهم نبتت بدري
قاموا صدقوا الكلمة اللي طالعة من الحياة
وقالوا نكتب فيها شعر
نفس العيال جم شاخوا أسرع م الهوا ف ليلة شتا
فاتصدموا من إن الحياة شاخت وباخت
وبرده كتبوا الشعر فيها!
2/10/2014
