انا والحب متخانقين
ومختلفين
كان ليا تار بايت
وخدته
وبقينا متساويين
وبقينا احلى اتنين
ومتصاحين
لكنه ديب فجعان
عمرى ماشوفته امين
جالى فى ليله كأنه
معاه فرح السنين
جايب بنات فى اديه
وحده ووحده اتنين
عاشقه وعاشقه الحب
ويقولى تختار مين
وافتح دولاب الذكرى
مليان هموم وانين
قولتله سيبنى لبكره
هديك قرار بعدين
وناديت نجوم الليل
فولولى طريقى منين
ده الحب جاى يغرى
جايب معاه قمرين
دلونى مين اختار
ده الكل منى احتار
ولا شفت منهم لين
..
ردو عليا برد
مليان ملامح صد
وقالولى يابنى اتهد
مش كنت لسه حزين ؟
عاوز نقول الجد
الحب خان العهد
وانت اللى شفت السد
مزروع على الجنبين
نزلت دموع العين
والحيره منى احتارت
والقلب وسط نارين
وهمومه ما زالت
عدو يومين ويمين
والحب جاى يجرى
فينك ياعاشق فين
مستنى من بدرى
ساعة السؤال بصيت
والعرض كان مغرى
اخترت بنت النيل
والنيل هواه يسرى
....
عدو يومين ويومين
والحلم راح منى
ورجعت باكى حزين
ولا حد شال عنى
سارح بدمع العين
والحب خان عهدى
وكانى يوم مااخترت
واديت انا وعدى
كان عندى سوء تفكير
والوقت كان عدى
