يا رصاصه قولي اتكلمي
مين اللي قالك تقتلي؟!!
مين اللي قالك تنزعي
الروح البريئه
من قلوب كانت بتعشق أرضها؟!!
مين اللي وسوس للزناد؟!!
مين اللي جهزلك عتاد؟!!
مين اللي يتم روح يا دوب
لِسَّه بتحبي في صغرها؟!!
مين اللي بكّا الأمهات ؟!!
مين اللي رمّل في البنات؟!!
ايه اللي يستاهل قوليلي
علشان يخلي الناس بتقتل بعضها؟!!
يا رصاصه ليه الغدر فيكي ؟!!
ومين راشيكي ومين حاميكي ؟!!
ومين بيقتل بس بيكي
ناس بتعبد ربها ؟!!
مين اللي فرق مسلمين؟!!
فرق ما بين مله ودين ؟!!
مين اللي قالك ترسمي بغدرك
بحور دم الغلابه بقتلها؟!!
يا رصاصه ملعون كل شئ
يقتل في إنسان كان برئ
صايم وقايم ولا حارس
كان بيحفظ عمرها
