يدور الدور على الباغي
ولو تِطْوَلْ مدد تمهيلُه بالاسباب
ولو على غيره سَنّْ الناب
وسَد الباب ف وش الناس
ولو تنداس
ورود الحق بالرجلين
في أحلامهم وفي الميادين
يدور الدور على الباغيين
وع الناسيين
وع اللى بيلعبوا بالدِين
وع اللي بيقلبوا الموازين
و ع الباقيين من الحراس
وع الدايسين حقوق الناس
و ع الجلاليب
وع اللي بيشربوا المشاريب
ولا يحاسبوش
على كل اللي حافظينهم
أسامي وفاترينات ووشوش
و ع اللي بيدبحوا الطيرة
ولا يسَمُّوش
على أمريكا وكلابها
و ع اللى بيحتمي بيها
ويتمرمغ على بابها
و ع الشوالات
وع البترول ودراويشه
وعرش بيلعبوا ف جيشه
وقايش يشنق الغلبان
وقايش عسكري غلبان فِضِل منه
ولو تسأل على سِنّْه
خَضَــــــــار لسة ما شفش أوان
وبنت تموت عشان وردة
وعيّل تحصده لوحة
يموت على علبة الألوان
وأم بتحضن المشاوير
عشان تلحق تشوف
جثة واكلها الطير
يجوز يمكن يكون هوه
يا رب الظن من جوة
بيلهب ف الحشا النيران
وظابط لسة متخرج
ف يتخرج على الشاشة
بدون عنوان
سوى حبة كلام فارغ
عن الصبر اللى لازم تشمله
بدمعك
وبالنسيان
يدور الدور على الباغي
يدور الدور على الطغيان
يدور الدور على سيرة بني الإنسان
