ذكريات الغد 2
أحمد البوهي
لثّم صمتك
واخفى ملامح وشك كله
خلف سواد الليل
ارسم صورة فى لوحة وهمك
صورة تجسد كل ملامحك
بالتفاصيل
ركّز اكتر
عالتجاعيد المنحوتة المكبوتة فى وشك
واياك تنسى الحسنة السودة
المركونة على رف شفايفك
خايف؟
..عارفك..
مع انك مش ضامن عمرك
خايف من بكرة
على فكرة
لو تفضل خايف كده على طول
هتضيع معانيك فى طريق مجهول
ويطول وياك حزن الايام
وتسلم نفسك للاوهام
واللون مخطوف
وفى مد الشوف جواك
هتخاف وتغمض عينك
مش هتشوف
غير عتمة ضلمة يا دوب تسمحلك
ترسم صورة فى لوحة وهمك
خايف؟
..عارفك..
هش..وأمانيك كلها ماتت
احساسك ..مات
وزمانك..فات
ومدار الشك اللى فى بالك
حواليك بيطوف
وآثار البسمة اللى فى وشك
ماتت مالخوف
..
لساك خايف ؟؟
