فى بلاد السيكوبولس
هاني مهران
في بلاد السِيكُوبُولُّسْ
تلقى مولد سيدي أُنُّسْ
يتْنِصب لجل أما تُرْقُصْ
والأُبَيِّجْ يبقى ليهم
وانت ما طلعتش بحمصْ
***
في بلاد السِيكُوبُولُّسْ
جوا مولد سيدي أُنُّسْ
الإدارة عَوْ بِخْ
لو حاولت إنك تِلامِضْ
تبقى ليلتك طِيخْ وطَخْ
تُكْرُش الدَاوْ اللي زقك
اللي قبلك راح ونَخْ
بالفكاكة
تكتشف لحظة وصولك
إنه كان ناصب فِـ فخْ
تلقى نفسك جوا قهوة
مِعَمَّر الطاسة بْكَرَانِسْ
هَمُّهُمْ دفع البَرَادِسْ
كُعْ فِكْرَكْ
شِد في الفكر المدُوحَسْ
دا الليلة دي البرد قَارِصْ
والإدارة فـ سيدي أُنُّسْ
عَيِّنِتْلَك ألف حارس
يمكن الشِيتُوسْ يِوَزَّك
تفتكر إن إنت فارس
بالهَجَايِصْ يملَى عقلك
وإنت هَارِشْ
لو حاولت إنك تِنَفِّسْ
تبقى واحد م السَبَارِسْ
تهْرِسَك رِجل الإدارة
غصب عنك
تبقى عَرْعَرْ للكبار
ليه يا صاحبي
تحُطْ نفسك فـ المَزَانِقْ
لو جدع
خليك حمار
شيِّلُوك.. احرن ونهق
يضربوك.. احرن ونهق
كتِّفوك أو علَّقوك
احرن ونهق
لو ...
احرن ونهق
تبقى قدامهم بهيم
وانت أصلاً واد مِدَقْدَقْ
فاهم الفُولَة وهارِشْهَا
يعني فُلَّة وفي السليم
ومقلْوَظ الفكر القديم
ومشَبْرَق الصحبة بملُخْلُخْ
يعني راجل مستقيم
مهما تعمل
حتى لو بِعت القضية
مش هتبقى ف سِين وجِيم
( تم كتابتها 2004 )
