آهة
هشام صبح
آهة
آهة وآهة على آهتين
بتوضى فى ليلى بدمع العين
والبعد يغنى بترنيمة
يترجرج قلبى مابين ضلعين
وف حلمى اشوفك ضواية
بتنور قلبى بحلم جميل
واسيب سرداب ادخل دهليز
يتخفى الهم بلون ابريز
ويبان غالى ولكنه فى اصله تمن رخيص
واتشد ايه
يتلهف قلبى ويجرى عليه
والقانى سراب
وف ايدى تراب
اتلفت تانى واحن اليك
ياحبيب الروح
ع البعد اشوفك تبكى وحيد
بتمد الايد
اصرخ وانادى بعلو الصوت
يتخنق الصوت
والصمت بايده يلف الكون
يتشندل قلبى مابين خطاويه
يتسلسل حلمى ف غمضة عين
وامد خطاوى
يرجعلى الحلم يغنى حزين
مملكش اكون والقيد بيزيد
بيطفى شموع
ويفوت جوايا شجر مقلوع
اوراق دبلانه ف حضن خريف
واقول تخاريف
وافكر نفسى _قال ايه_ابو زيد
واستنى تكون
الغنوة ف قلبى لحن خلود
يتسطر اسمى مابين عاشقين
فرسان دايمين
فى البال والفكر وفى الخاطر
فى الروح والقلب وجوه العين
يتنفض القيد
وابص اشوف الحلم بعيد
ويموت ابو زيد
ولافيه ملايين تهتف بحياتى فى احلى نشيد
وافضل انا,انا
دايما انا
فى الساقية وحيد
متغمى عنيا بلف وادور
