ب تغنى لمين ؟؟
عمرو شاهين
ب تغنى لمين ؟؟
1
زى نور الفجر
لما ب يعلن انتهاء الوصل بين العاشقين
كانت عينيك السهرانين
نقلت اشاره ب رغبتك
ف الالتحام ب الخوف
مع ان سكان السما
وافقوا اخيرا
يمنحوك العفو عن كل الخطايا
بعد اعترافك ب الذنوب
على عتبه التوبه
انما
كان اللى مانعك م الطواف بالبيت
صوره
متبروزه
فى مدخل القلب اللى فاتح دراعه للسما
وب يشتهى الغفران
......
2
مع انهم من زمان استغربوا
ازى تخلى سمسميه
تعزف الكلاسيك
وشخباطات المشتاقين للنور
ـ بالقلم الرصاص ـ
تغلب الموناليزا
ف ترد ب انسيابية شديدة
تغلب اندفاع سيل الخجل
بين عروق المشتاقات للشوق
- السر صنعه
والعشق وحده
يقدر يخلّق من جديد
موناليزا ب القلم الرصاص
ويخلى اوتار سمسميه
تغلب الفيولين
...........
3
وتغنى لمين ؟
والكل متسلّطن نشاز
واصل لحد الشوشره
على وشوشات دق القلوب
الخرس
اصبح طريقه للخلاص
من تفاهات الكلام
واللسان اصبح وسيط للعولمة فى الزمن العجوز
صوت الغنا
بقى زى صوت البحر وسط القاهره
عمرك ما تقدر تسمعه
غير ف الخيال
حتى الخيال
ممنوع بحكم المحكمه م البوح
مع ان اسراب الحمام
هاتموت
لو حكموا مره ب منعها م النوح
....................4
واما الطوفان
انهى رسالته ف الحياه
طارت حمامه عششت ع البر
فهم اللى امن ع السفينه
ان الطهاره
اول مزايا المولودين فى الكون
ف بلاش يصيبك الاندهاش
لما تشوف ابنك المولود جديد
واقف امام
ب يصلى بيك الفجر
ف القدس الشريف
وما تعتقدش
ان بوضوءك ف الحرم
اكبر علامه على الطهاره
الرب ما حرّمش الخيال
هما اللى منعوا م الغنا
فلا بديل عن السؤال
هو الحمام لساه يغنى للبشر
ولا البشر
حرّموا فعل الغنا على سرب الحمام ؟؟
