رغيف العيش
أحمد عبد العزيز
رغيف العيش صبح غايه
وكل الناس بتــتمنى
ولجل تنولوا ويايا
طابـور ف طابور هتستنى
شهادة الجيش ويلزم فيش
وكام صوره تجبهالنا
ونبقى نشوف قريبك مين
عشان تاكله وتتـــــهنى
وأصل اللقمه يابن الناس
مهش بالسهل تلاقيها
ولازم تندعك تنداس
عشان بسلامته حاميها
ولازم تشتغل بالفاس
عشان يمكن يجود بيها
وتتشقلب قصاد الناس
وتمسح جوخ لعاطـيـها
وايه ذنبي أجوع واتهان
واروح وامدح فـى راعيها
وابات واصحا بهم القوت
وابارك مستبديـها
وليه القسوه يابلدي
وليكي روحي بفديــها
تخليني أخاف واهرب
وغيرك خيري أديـها
فـ غربه ولدَت همي
ونزلت دمعتي فيها
وأرضك هان لها دمي
وبخلت باللي فـ اديـها
وليه الظلم يابن الناس
بقى مكتوب على قوتك
وفي بلدك تطاطي الراس
وصوتك يخرسو سكوتـك
وقبل ماتتولد تلقاه
بيستعجل قوام موتـك
وانا لا ليا فـ المجلس
ولا الكرسي ولا الأحزاب
وكل منايا والله
رغيف العيش يدق الـباب
وعايزه حاف انا راضي
وهعملوا بقلبي حـجاب
وهمسحها دموع أمي
و هرحم شعرها اللي شـاب
تودعني وانا خارج
بدعوة قلبها اللي طـاب
واروح اهتف ومش خايف
من اللي عض قوتي وغاب
وخلى بلدنا يا سيدنا
بقت مـ الظلم تاني خـراب
وعين الغدر ترصدني
وتتوعد بألف عقاب
وفي لحظه .. أنا عارف
راح اطفي بس زي شهاب
وفركش كله راح يجري
ويتخفي ف حضن البـاب
ويلمح وشي فـ النشرة
وتحته .......
يسقط الأرهاب
