"مبـــــــــروك"
أحمد عبد العزيز
مبروك ,, ونفسي الناس تقولهالي
ويدق بابي صحابي ويــّا عٌزالي
مقفوله عني البيبان بيني وبين ناسي
والغربه هيه الجليس وفى الجروح آسي
وباقي ست ساعات ويعلّقوا الفرحه
على المداخل تنوّر وفـــ قلبي انا جارحه
قاعد صريع غربتي مكتوفه أياديني
كان نفسي أكون جنبها أهدي لها الطرحه
واقول أخوكي فى وقت الفرحه قدّامك
أمسح دموع فرحتك لما تفارقي البيت
واقطف زهور وحدتي وانده بعلو الصوت
كان نفسي اشوف عمي واقف على بابنا
وياه ولاد عمي بتضمهم دارنا
نغم الصبايا قصاد الفرن يطربنا
وافرد فى قلبي حصير البهجة مستني
لكل من جه يشوف الفرح .... ويهني
وادعي القريب والغريب ومفيش غريب عني
وكل من جه يقول مبروك وشرّفني
هرفع مقامه فوق وأشيله فى النني
ياابويا نفسي تكون راضي وتعذرني
منعاني والله الخطاوي وانتم بعيد عني
تنفخ فى روحي الحياه من دعوتك خيري
وتنجرح لو تشوف الزفه من غيري
تسمع لقول الناس بالحسره تتمرر
وفـــ وسط ضرب الدفوف الدمعة تتحرر
وأمي فضلت على دا الحال تقول : بخته
ابني وضنايا الوحيد ميخدش أيد أخته
دقيق فطير الفرح دايب بدمعتها
وتحس نور الكهارب اللي بباب بيتها
والع كما الجمر يحرق قلب فرحتها
ياأمي حِملك عليه دا البعيد مملوك
مش غاوي لم الدراهم أو بيهوى الشوك
ولاناسي كلمة زمان " كتفك ف كتف ابوك "
ولا سهل يبعت جواب ويقولكم :
"مبـــــــــروك"
