لص محترف
مش غريب
إن كل الناس تقرا ف عنيك الهزيمة
ويحزنوا
من غير ما يقولولك؟
بس الغريب
انت نفسك مش حاسس بيها
ولا معتبرها حصلت بالفعل
أنا متأكدة
إنك بتدرب كويس وبانتظام
على حماية روحك م الوجع
حتى لو اضطريت تلونها
أو تخلى طباعك زى مية الدهب
وعارفة حبك لثمرة جوز الهند
وعلاقتها بصلابة وشك
لكن ساعة ما نتقابل فى المراية
مش ح يفضل لك منها غير المية
اللى بكتها عليك بجد
وسط البلد
زحمة الكورنيش ف اغسطس
مجانية المشاعر ،واعتياد اللقاءات الحميمية
كلها حاجات
بتقل روحى
بتخلينى ما اقدرشى امشى ع المية
ولا أطوى الارض
وعلى ما استعيد قدراتى من جديد
تكون علمت فى الايام
بحاجات اكتر من قهر اغسطس
ومية جوز الهند
قصص الحب
شبه سهر فبراير
طول او قصر
برضه مش كامل
وما تقدرش ترصد الازمة ايه؟
قوة شخصية وسخاء روح
ولا إنك مغفل سرقك حرامى محترف؟
أو إنك
تتغاضى عن سرقة الناس لدمك
على اعتبار إنه بيتجدد
وإنك بتتفرج
وبتعمل كراكترات تستفيدبيها ف الكتابة
وتبقى انت
حقيقى حرامى محترف
