البومات
محمد شعبان
الليل خلاص
دوره انتهي
سلم أدان الفجر
اخر دمعتين.....
وصي النهار يطول
كمان و كانه مل
من السهر ف الضلمه
وسط المجروحين....
فاتت سنين
كل اللي باقي
بزهوته،
ضحكه شفايفك ف الصور
و كلام عنينا من سكات
شفتي الزمن
رغم انه سايب روحنا فينا
موت الدنيا ف قلوبنا
وكل ما نحاول نعيش
منلاقيش غير البومات
و الذكريات
هروين حياه
و الجرعه قد ما تدي راحه
قادره تقتل بالبطئ....
خط سيري لما اجيلك
خط سير الدم فيا
كل ما اتخيلني بوصل
ببقي ف بدايه الطريق.....
تقطع السكه ف وريدي
يعلي صوتي لو انتي سامعه
تنزف الذكري اللي ملت
من وعودي ف كل جرعه
انها تبقي الاخيره
كنت برمي اللوم لصدفه
و العن السكه اللي ضاقت
لاجل ماتجمعني بيكي......
كنت بقدر اخلي عقلي
يفتكر (فات المعاد)
يفتكر صولو البيانو
ف (نبتدي منين الحكايه)
و الحكايه
ان عيني لسه بتدور عليكي.....
و النهار بينادي شمسه
حط ايده فوق كتافها
و قال سلام
القلب مات....
و انا لما احس بروحي
بدات تتسحب
بهرب اوام للالبومات.....
