بلد فيها العجب الوان
هى ..كعبه كل عين
ليها العيون بتحج
رهبان ساكنين بياض العين
ومخططين الوش بالحاجب
الجسم متعمد بملبن
والرب بعد الخلق باركها
فضيت عيونى ف وشها نظره
المجد..كل المجد للفقرا
يشوفوا الجمال يعمو
مغلوله ايدى يا سمرا
كعيل نفسه ف العجوه
بس البلح عالى
فبيحوش عشان يكبر
ويتوظف
ويتجوز بعين الاهل
ايا سمره..لو كنتى ادم
كان الشيطان يسجد
ويتقرب
لاجلن يكون الضلع
اللى بينبت عروسه
اهه يا سمرا لو كنت خيل
كنت عرفت ازاى
انام واقف
وافوق واقف
ومحلمشى وانا واقف
ايا سمره..سجودى بس للمولاى
وللقمه
لأبويا
لامى اللى بشبها ف لون العين
وف الطيبه
وتشبهنى ف حب السمر
ياطعم التمر ف ابويا
يا حلو ومر
انا شبهك
ايا سمره..يا خماره
أنا المخمور
أنا الساكن بلاد ف جحور
ومانعين الهوى عنى
اهه يا سمره لو جيتى عندينا
وشفتى البحر
أصل البحر عندينا
ماهوش ميه ولا رمله
اهه ياسمرا ومية اها
على الشمس اللى بتعيط
وتحضن كل يوم الشط
اهه يا سمرا لو جيتى عندينا
وشفتى الود
لساه بيوصلوه باليد
لساه البسطجى أعمى
ولساها الرسايل بنت
لساه العمده عندينا
بيروى الارض بالسخره
ويبنى السد
