شيزوفرنيا ..
لمعان نجوم السما
ريحة شجر الليمون
اصوات كتير مبهمة
سير الرياح بجنون
وصوت منير يعلى
في عشق البنات .. أنا كنت نابليون
ويمس قلب حبيب
فيهز بيه الكون
والبحر هيعافر
وهيسافر مع الأمواج
ويموج في كون واسع
فيهد أي سياج
واللحظة تتسجل
مع عودة الحجاج
الشوقة والأحضان
والدعوة بالغفران
يا رب يا منان
نفرح كمان وكمان
وأما يوم الجمعة ييجي
يعلى في ودنا الآذان
نلبس الجلابية بيضة
بعد مانصلي نروح
نشتري بجنيه جريدة
تلقى اخبارها حزينة
بس احلامها عنيدة
بس لما .. تفتح الصفحة الاخيرة
تلقى ديما .. النهايات السعيدة
وأنت بتعدي الطريق
تلقى واحدة كبيرة واقفة
مد ايدك .. خد بإيدها
قد ماتقدر .. ساعدها
تلقى دعوة .. جاية منها
روح يا ابني
ربنا يبارك في مالك
وف عيالك
تلقى أبواب الحياة
تنفتح على طول قبالك
ثم روح
حضر الشاي باللبن
واقفل الاوضة عليك
مع آذان العصر صلِّي
للسما ارفع ايديك
وادعي ربك
ينصرك عاللي يعاديك
ينصفك في بقية حياتك
بعد كده غمض عينيك
عيش في صندوق ذكرياتك
افتكر كام حلم جبته
وافتكر كام حلم فاتك
ثم إصحى من سكاتك
علي إحساسك بذاتك
ثم نام
هتلاقيها في المنام
وإنت واقف جنبها
لسة زي ماهي وإنت
لسة فاكر شكلها
العيون والضفاير
والجونلة والزراير
وإنت بتبصلها حاير
هو في براءة كده
ثم إصحى من الثبات
انسى كل الذكريات
وافتكر إن الحياة
حاجة من حبة حاجات
فيه حاجات بتجيب حاجات
و فيه حاجات تبعد حاجات
وعشان كده
العمر متقسم ساعات
يا ايها البهوات
العمر ده لحظات
عيشها كما هي
إفرح في وقت الفرح
ابكي في وقت البكى
وغني وقت الغنا
ميت ألف أغنية
الدنيا مسرح كبير
فيه الحرامي والعصامي
وفيه الغني والفقير
وأنت بإيديك تختار
تلعب في أنهي دور
وبأي شخصية
