آل يعني حتقوللي ايه باقيلي في الدنيا
هالة فتحي
آل يعني حتقوللي ايه باقيلي في الدنيا
وصلت بابها بشوق .. دقيته بكفوفي
مش فاكره مرت سنه و انا واقفه .. أو ثانيه
و لما دخلت أخدتني علي المندر
حطت في ايدي تلات حصوات مش اكتر
و قالتلي يللا اهمسي و اتمني يا صبيه
و ارمي الحصا بعدها ع المفرش الاحمر
وشوشته انا و رميت
و قعدت و استنيت
و لما ضحكتلي
ما انكرش ... انا اتشديت
قالتلي في طريقك انا شايفه واد خيال
شايلك علي حصانه ..
ماشيين دروب و جبال
قاصدين سما بعيده
فيها الحياه جديده
فيها المال و العيال
و أوام سألتها مين ؟
جاوبتني بضحكتين
يبدأ بحرف السين
و قالتلي خدي بالك
في حد في جيرانك
عينه علي سكتك
راقد مكان خطوتك
و غاوي أحزانك
و أوام سألتها مين
شاورتلي بالدراعين
واحد طويل و سمين
قالتلي يوم السعد
حيبقي رابع حد
من شهر تلاتين يوم
حتنسي فيه النوم
بس اثبتي ع العهد
و قالتلي قدامك
يا حلوه سكه سفر
و حتمشي طريق طويل
لكن مليان حفر
حتعدي ع الاهوال
و تخطي ياما جبال
و حتبقي ام جميله .. لولد زي القمر
و أوام سألتها فين
جاوبت بـ تنهــيدتين
قدرك في نني العــين
و مرت الايام
واحد ورا التاني
تشبه قوي بعضها
و وراها ساحباني
ما بقيتش زي ما كنت
حاسسه قوي اتغيرت
ولا الحياه عشتها
و لا هي عايشاني
و سنين كتير مرت ... واحده ماهيش فارقه
عيني على السكـــه .. بارقب كما العاشقه
باستني خيالي
ياخدني للعالي
و نجوم تضويلي
و قمر في سما ... زرقا
و اسألني بسخـــافه
و انا ع السؤال لايقــــــه
خدعتني عرافه ... و لا كانت صادقه
