دجال
أحمد سليمان
يجى البخور دلوقتى لازم تنصرف
والشيخ يتمتم جوه رمل زمان تلف
والزومه تبدأ ويا اسم اللى اتعرف
فيزيد بخوره ..يبخرك
لمحة دخان بتطيرك
فتقول يا رب يقدرك
تجمع شتاتك من بقايا الملحمه
انا ليه يا ناس من غير سما
ليه ارض غيرنا بتتحما
يمكن بقينا الوقتى ارخص م التراب
والنور ما بينا الوقتى راب
وما عدش غير حبة سراب
بعيد عنك لانا قاتل ولا مقتول
ولا شطى باينله وصول
فيخرج ويا رنة صول
وتخرج رنه مهجوره
تدور ف القلب كام دوره
وانا واحلامى مكسوره
ولا باحلم اكون جارح
ولا حتى اكون مجروح
انا يعنى يدوب باحلم
اعيش نفسى
حلاوة روح
