طبطبة
محمد الأقطش
انت السجين وانت السجان
اسجن همومك ف غيومك
واقبض بكفك ع القضبان
خليك عنيد وبقلب حديد
حارب بعقل وكل جنان
انت الجنود ومالكش وجود
وانت السلاح ومالكش أمان
ادبح وريدك .. وبإيدك
طبطب على القلب التعبان
إياك تسلم .. واتكلم
بالصمت توصل للعنوان
العشق مر .. وغيره أمر
يا حزني ع اليأس العشقان
النظرة لو كانت بانت
بالسر .. كان الكل يبان
لكنها حكاية حكاية
الكل فيها حقيقي مدان
وانت الأمان والغيم والخوف
وانت اللي كنت على المكشوف
بتداري على عش كناري
شقشق صباحه ف وقت كسوف
يا شمس صابحة على مصالحة
مع نفس ناوية تكون شيء كان
قولي لقمر الليل .. يا دليل
يهدي اللي تايه والحيران
شباك سجينك .. مسكينك
مستني نورك ع الجدران
يا سجن ساكن حرية
عمر البراح ما يكون له حدود
إلا براح روح الإنسان
انت السجين المتحرر
وانت الأمل لو كان له مكان
