... خيالك ...
أمير لبيب
خيـاِلك و انا
بينا عـِشـِرة عمر
خيـِالك و قتها
كان على ناصية شارع فاصل
مابين صورة
رسمها قلبى على خد السنين
و بين صورة
بترسمها السنين .. على ضحكتِك
حبيت خيالك من ساعتها
و اتخانقنا و اتعاتبنا بالساعات
و كنا بنقضَّى اليالى
ساعات كلام
و سنين سكات
عارفة ..؟؟!!ـ
لما كنت بحس ضيق
ولا مرة مابصيت للقمر
ولا عمر ايدى رسمتك
قلوب على كتف الشجر
انا كنت انادى على خيالك
و ارسمه على اى شيئ
ع الشوارع
فى السما
فى وشوش صحابى المتعبين
و كنت افوق على كلمه منهم
ايه يا ميرو ؟؟ ... رحت فين ؟؟
ينتهى المشهد بسرعه .. مش بقولك
متعبين
.. انما
عشرتنا يمكن طوّلت
و زهقت منه بدون زعل
ماهو برضه مايصحش اوى
يكون حبيبَك شيئ خيال
لا و الاكيد العالم المجنون
راح يوصفك " مجنون اوى "
فأسمحيلى
اسيب خيالك
و ابقى مجنون ...
..
..
و احضنِك ..
