كفك
مدحت فضل
كف إيدك
اللي شاور لحلمك القديم
من ساعة
واللي شال شنطة إسعافات الوطن
من أول الشارع .... لحد هنا
كف إيدك
اللي مصاحب ألوان الجرافيتي
على حيطة الجامع
واللي معلم على كل هدومنا
الشتوي
كف إيدك
اللي اتعلم
يمسح دم العصافير الثورية
ويطبطب على ريش جناحاتها
قبل ما ترفرف ف مشوارها الأخير
كف إيدك
اللي انت رفضت كتير
إني اقراه
بين إيدي دلوقتي
وقريته
وعرفت ليه كنت بترفض
عشان كف إيدك كداب
إزاي يكون خط العمر طويل
واحنا دلوقتي
بنحضرك للجنازة ؟!!
