ماعنديش حبه عيّاط زياده
بطلعهم عريانين
من دفا عيونى
لبرد الحزن
وماعنديش تكشيره
تاخد نص وشى لفه بالعجله
وتسيب ف قلبى
رهن...
تسيب خربوش
أو تكتكة برد
أو غنوة أحتياج
وكل مافى الأمر
شئ بسيط
وغويط ف نفس الوقت
(كل مابتفقد عزبز عليك)
تتعرى بزياده
لمّا أبوك بيموت
بيتقلع من عليك القميص
وتواجه الدنيا بفانله بحمالات
وأما أمك تموت
بينكسر زورك
وتحشرج على منحنى التفاحه
حوا
بتتعرى من جوّه
ويخشك البرد
والعفار
وتتبل بالتراب
فتعيّط من شعرك
وودانك
ومناخيرك
ومناخيرك
وزورك المكسور
كتفك
ودراعاتك
ورجليك
تعيّط وراك وقدامك
وجنبك وحواليك
تتغرّق عياط
ويُتم
ياااااااااااااااا الله
برد السنادى عنيف
وأنا...........
طول عمر جسمى ضعيف
أنا على سلالم الخريف
مش حمل أكمل السنه عريان
وماعنديش غطا
ماعنديش أمان!!!!!!!!!!
